Starf Flatar í 30 ár

Flötur, samtök stærðfræðikennara, voru stofnuð 3. mars 1993 og eiga því 30 ára afmæli á þessu ári. Aðdragandi að stofnun samtakanna má lesa um í greininni, Skyggnst í faglega þróun íslenskra stærðfræðikennara, sem finna má í 20 ára afmælisriti Flatarmála 2013. Stærðfræðikennarar höfðu áður margir tekið þátt í alls kyns námskeiðum og fræðslufundum. Þannig hafði skapast grundvöllur fyrir stofnun samtaka sem strax frá upphafi gætu skapað tækifæri fyrir stærðfræðikennara að hittast, miðla hugmyndum og ræða um kennsluhætti í stærðfræði. Hér á eftir verður stiklað á stóru og gefin innsýn í starfsemina á liðnum árum.

Á hverri námstefnu er alltaf fjöldi vinnustofa um ólík viðfangsefni og hafa margir íslenskir fræðimenn og stærðfræðikennarar lagt þar hönd á plóg. Í Flatarmálum 2013 má finna yfirlitsgreinar um hauststefnurnar og þær námstefnur sem haldnar höfðu verið fram að því. Á þessu ári var námstefnan haldin á 30 ára afmælisdegi Flatar á Bifröst og var dagskráin fjölbreytt að vanda.

Stærðfræði í umhverfinu á námstefnu Flatar 2023

Félagsstarf 

Á fyrstu árum Flatar var áhersla lögð á að efla tengsl og byggja upp góðan grunn. Í því skyni voru haldnir ýmsir félagslegir viðburðir eins og skemmtikvöld og árshátíðir þar sem fólk hittist til að skemmta sér og ræða sameiginlegt áhugamál sitt, stærðfræðimenntun. Fundarboð voru þá send á pappír og má sjá sýnishorn af einu slíku hér til hægri.

Þátttaka í erlendum ráðstefnum 

Flötur hefur staðið fyrir þátttöku íslenskra kennara á fjölþjóðlegum ráðstefnum. Árið 1997 fóru 27 kennarar saman á norræna ráðstefnu í Nordfjordeid í Noregi. Í Flatarmálum 1997 er að finna frásagnir þátttakenda sem gefa mynd viðfangsefnum ráðstefnunnar. Árið 2000 stóð Flötur í samstarfi við Kennaraháskóla Íslands fyrir sambærilegri ráðstefnu norrænna stærðfræðikennara og rannsakenda í Borgarnesi. Þátttakendur voru frá öllum Norðurlöndunum og var ráðstefnuhaldið lyftistöng fyrir starfsemi Flatar. Náttúran hafði áhrif á ráðstefnuna, bæði voru stórir jarðskjálftar dagana áður og síðan lék veðrið við ráðstefnugesti og miðnætursólin heillaði alla. Norrænu stærðfræðikennarafélögin héldu síðan ICME10 árið 2004 í Kaupmannahöfn og unnu þar saman að undirbúningi og framkvæmd. Fjöldi íslenskra kennara sótti ráðstefnuna og sumir héldu þar erindi.

Árið 2016 stóð Flötur fyrir hópferð á ICME13 sem var haldin í Hamborg í Þýskalandi og tóku fjölmargir íslenskir kennarar þátt. Flatarmál 2016, 2. tbl. er tileinkað ráðstefnunni en þar má meðal annars finna frásagnir þátttakenda af upplifun sinni á ráðstefnunni. Íslenskir kennarar hafa sótt ýmis námskeið á vegum norrænna stærðfræðikennarafélaga og hugmyndir eru um að endurvekja samstarf félaganna.

Dagur stærðfræðinnar

Gaman er að sjá hve Dagur stærðfræðinnar hefur flakkað til á dagatalinu. Upphaflega var ákveðið að halda Dag stærðfræðinnar þann 27. september í tilefni af alþjóðlegu ári stærðfræðinnar aldamótaárið 2000. Sú dagsetning þótti ekki henta af ýmsum ástæðum og því var ákveðið að færa hann þannig að hann væri fyrsta föstudag í febrúar. Seinna var hann færður aftur því hann rakst oft á við Dag leikskólans 1. febrúar en þá var Pí-dagurinn 14. mars valinn. Spennandi verður að fylgjast áfram með þessu flakki. Á hverju ári hefur verið valið þema og útbúin verkefni fyrir kennara til að nýta með nemendum sínum í tilefni dagsins. Fyrstu sex árin voru gefin út sérstök hefti sem ennþá er hægt að fá með því að senda beiðni til Guðbjargar (gudbj@hi.is).

Dagur stærðfræðinnar
í leikskólanum Marbakka 2023

Samstarf við Menntavísindasvið HÍ

Frá upphafi hefur Flötur verið í góðu samstarfi við Menntavísindasvið HÍ. Þetta samstarf hefur verið góður vettvangur fyrir báða aðila til að mynda tengsl og læra hvor af öðrum. Kennarar á Menntavísindasviði hafa lagt mikið að mörkum í starfi Flatar. Flestir viðburðir hafa verið haldnir í samvinnu og hafa kennarar Menntavísindasviðs bæði tekið þátt í undirbúningi og verið með vinnustofur á námstefnum og námskeiðum. Í nokkur misseri var auk þess gefin út sameiginleg dagskrá með viðburðum í hverjum mánuði.

Jóladagatöl Flatar 

Haustið 2018 var ákveðið að byrja að gefa út jóladagatal Flatar. Þar væru 24 stærðfræðiþrautir fyrir breiðan aldurshóp sem kennarar gætu nýtt í desembermánuði eftir því sem hentaði. Hér eru slóðir að fjórum síðustu jóladagatölum Flatar: 2019, 2020, 2021, 2022. Þrautirnar má að sjálfsögðu nýta allan ársins hring.

Flatarmál

Tímaritið Flatarmál er málgagn Flatar, samtaka stærðfræðikennara. Á þeim 30 árum sem liðin eru frá því að fyrsta eintak Flatarmála leit dagsins ljós hafa komið út 40 tölublöð á pappír auk sívaxandi fjölda rafrænna greina á nýjum vef Flatarmála. Óhætt er því að segja að Flatarmál sé hafsjór af fróðleik og hugmyndum en í þeim má finna ótal margar áhugaverðar greinar, viðtöl og frásagnir skrifaðar af kennurum og fræðimönnum á öllum skólastigum. Greinarnar fjalla um stærðfræðinám og -kennslu, námsmat, stærðfræðiráðstefnur, upplýsingatækni í stærðfræði, sögumola, þrautir og fleira sem getur nýst kennurum og verið þeim hvatning bæði hvað varðar skipulag kennslu og starfsþróun.

Efnisyfirlit fyrsta og síðasta tölublaðs Flatarmála sem gefin voru út á pappír

Í gegnum árin hafa fjölmargir kennarar skrifað um fjölbreytta kennsluhætti og sagt frá verkefnum og vinnu nemenda. Það gefur innsýn inn í skólastofuna sem hæglega getur nýst öðrum kennurum. Hér er gerð tilraun til að safna saman þessum hugmyndum og verkefnum í nokkurs konar verkefnabanka sem yfirlit fyrir kennara. Einnig höfum við hug á að endurbirta eldri greinar af þessum toga jafnt og þétt á vef Flatarmála með von um að þær veiti öðrum innblástur.  

Verkefni og hugmyndir er að sjálfsögðu hægt að útfæra eins og hentar og í samræmi við nemendahópinn. Verkefnabankinn er ekki tæmandi listi og því hvetjum við alla sem hafa áhuga á stærðfræðimenntun að lesa eða endurlesa Flatarmál sér til gagns og gamans. Við hvetjum einnig kennara á öllum skólastigum til að skrifa frásagnir úr skólastofunni í Flatarmál. Greinar sendist til Birnu Hugrúnar, ritstjóra (birnahugrun@gmail.com). 

Í Flatarmálum má finna greinar um fjölbreytt viðfangsefni. Í töflunum hér fyrir neðan má sjá dæmi fyrir öll skólastig um viðfangsefnin: fjölbreyttir framsetningarmátar og tengsl, líkön og skapandi verkefni, rökhugsun og rökstuðningur, talað um og með stærðfræði og útistærðfræði. Tenglar á viðeigandi tölublöð eru í töflunum en auk þess má finna öll tölublöð Flatarmála hér á vefnum undir flipanum Flatarmál – eldri blöð.